الأحد، فبراير 07، 2010

مواساة


راه العمر لوطال ما طال لاسبد يوفي مديده

وراه الدهر قلاب حوّال وكل يوم يجبد جديده

ورد القضاء راه موحال لاتنقصة لاتزيده

وراه الحر حمّاق مزعال حتى أن كان ماهيش فيده

وراه الحمد هو خير لقوال وراه الصبر نعمة أكيدة

لانوصفك وصف بمثال لاحظ أضروفاً شديده

سامع وناظر وجوّال وماشي العلى والهويده

وسيع بيت لظّيف وكّال لي جقهبا لي نقيده

وفزّاع للغير ساوال علي سيتة كي تصيده

ولعاقب العرب دوم نشّال وعيّدلها يوم عيده

ولاعمر ذموك بهبال ولاعمر جيت للزهيده

ولاعمر رافقت لنذال هل اوجوهاً شينة بليده

ولاعمر تميت ضهلال في وان عزرة شديده

مع صاحبك دوم فعّال وحاسب أحساب البعيده

وخصمك اتقنتية بعقال يرغي ارغاة القديده

وصيتك كما صيت لبطال مذكور كيما تريده

وأسمك علي صالح الحال ونقبك علي نوع صيده

خذيت قرعتك موش مازال بيام عز وسعيده

واليوم خليك حمّال وكل يوم عنده ضديده

ونا عارفك سيد لرجال وصاحب ادباره سديده

وقاري الكوثر والانفال ويونس وهود المجيده

وعارف تباديل لحوال وفعل القدر في عبيده

ولاتحوس لايضيقلك بال ولاتقول دوه نكيده

وصلي علي خير لجيال شفيع أمتة من وعيده

ياما إيبكن فيه


يـامـا إيـبـكّـى فـيــه....خطا عزيز وفراقه وخلو ايديه
وضروف واجده
مامـا مـن أضــروف ايبـكـن ومامـن مشاكـل وقتنـا شبكّـن
ومامن قضايـا كـل يـوم ايتكـن ومامن علل فـى خاطـري كاميـه
ومامن ادروب انسيت وامتاركـن ومامن الـى ناسـي ونـا ناسيـه
ومامن الـى ديمـا عليـه ايتكّـن مشاغيـل نشـاده علـى طاريـه
ومامن الى من القل دونـه صكـن أبواب الرجـا قفـلن ونـا نبيـه
ومامـن الـى وازا بعـد راوكـن ايتومج امعاه الصـوب وايداريـه
ومامن الـى ودك عليـه ايركـن معازى وعزايـه ونـاس اتجيـه
ومامن اوهـام انجيتهـن يرتكـن اعضام خاطرى من الخلو حيه وحيه
مـامـن أضــروف أربـنــا ومامـن مشاكـل خاطـرى كادنّـا
ومامن قضايا ويـن نـام ايجـن ويسمر النوم ايغيب عن ماقيـه
شي من غلا غالى اقسـام زونـّا ولطة نصيبه بـو خجـل سافيـه
نضيف المجالـى بوغثيـت اثنـّا بو وسـط دوبـ حزامهـا طاويـه
ومولى ليديـن مخضبـات ابحنـا ومول الهوالع سود مـن باريـه
وشي قل ميجـوده وغصبـاً عنـا وشي بخت عاكس للخـلا زاويـه
ومامن الـى غايـب تباعـد عنـا وفـى مامضـا مشكـاه ومداريـه
ومامن الى لاجـاه جـت المحنـا ومامن الـى قطعـى الله يخزيـه
ومامن الى مشهـور عنـده رنـا اللى ماحضر جيلـه ايخبـر بيـه
ومامـن الـى ماكيفهـن جابـنـا ومـا يعرفـه واحـد ألاّ ولديـه
ومامن مطـارى ويـن مـا هفّنـا ما ايريد شي حد يطـرى ولا يطريـه
مـامـن اضــروف وعـــازه ومامن مشاكـل مالهـن حـزّازه
ومامن خبر لاو بـرج لو تقـازه ولو ضرب كف ولو كـلام فقيـه
ألاّ عزيز ما وفا امعـاى انجـازه امعكر شـراب العيـن ومدرديـه
مسـدا الغـلا مـا كملـه نشّـازه وسلّوا عمود الراس مـن عاليـه
حتى والزمـان امجربيـن ادرازه مامـن الـى قـلـواه ومكـديـه
مامـن ابحـارى تاركـه مركـازه ايام قبل ماكانـت اطيـور اتجيـه
ومامن فريقاً من الزمـان تـوازى وكم قرم قابي فـى حمـاة سفيـه
وكم قصر سبحانه علـى هنـدازه بقي اليـوم عاليه علـى واطيـه
ومامـن ربيـع ايعجبـك قرقـازه.........لكـن وراه الصـيـف متكفيه
وزيده اخرى بوخد كـى القـزازه.......انخلـط امعاه اغـداي ويوازيـه

السبت، فبراير 06، 2010

أمغير أصورهم


أمغير أصورهم لا عد أيجوا للعين لا تنظرهم
أعزاز عندنا تمن
أعزاز علينا أعزاز فقدهم مازال مثّر فينا
أعزاز طيفهم لليوم مو خاطينا
علي أثر لوهام لمسهم وجررهم
أعزاز يا رفاقه فقدهم طانينا
أمخلطين سيمتنا علي أمحورهم
حتى وفالحياه من قبل ياما رينا
هضول وين تضّايق بعيد نظرهم
أيديروا الخير وينغروا لزّينا
اصحاب البشاشه وين ما تخطرهم
ريت الزمان الغبر مقوى عينه
خذهم بلاش وما عطاء نادرهم
خذهم جبر وين ما نواهم حطهم فالقبر
لابهم وجيعه لا شكوا من كبر..
ونحنا علينا نلتجوا للصبر
من حاش حكم علام الغيوب جبرهم
الدنيا قديمه عامله بالعبر..
كمين ناس كي راد الكريم حجرهم
أعزاز يا محلاهم..أعزاز صارلي واجد علي فرقاهم
أنوض بالغطاء ونقول ياهم ياهم..
نحسابهم أحذاي بضحكهم وخبرهم
نحسابهم ألا يالاي في مصباهم حسيت
كي جبد السوال ذكرهم
ومازال خاطري مستوه من يالاهم..
مالدوج ينسرق ويطب في موكرهم
يحسابه أمغير منام يوم عزاهم..
ويلفوا عليه جديد ويعاشرهم
وهم في ثنايا لرض واريناهم..
عليهم حكم حكم الزمان دفرهم
حتى وهم أبعاد ومنقطع مرجاهم..
مع كل طلعت شمس متذكرهم
لا قدرت لا نقدر أني ننساهم..
ربوني دلال واجبي نذكرهم
أمغير أصورهم لا عد أيجوا للعين لا تنظرهم
أعزاز عندنا تمن

الأم


لا قبل قالوا لا حنان بعدها تسمر علي شانك الليل وحدها

لا قبل قالوا لا هناك مثيلها ولا فيه ف الدنيا حنان بديلها
تفرج عليك الهم كي تحكيلها وما من دبارة خير كي تنشدها
تمسح دموعك وين ما تشكيلها وكان قلت يام اتنوض من مقعدها
وبيتك هذك حايس ايحير دليلها ليلة رقاد الناس ما ترقدها

هي المحنه وهي العطف كله من اخلاف امنه
ان غبت تسمعها افلين كنه اتكابي بطول الليل في مرقدها
وهي اللي رضاها من رصيد الجنة لوما الشرك انقولك تعبدها

مي منانة وهي الود كله ومنبته ومكانة
وهي اللي معاها ما تجيك خيانه رضاتها رضاك وكل شي يسعدها
تفرح مع فرحك وهي زعلانة وتشكر نباك وشينتك تجحدها

هي العطوفة علي كل غايب لاحقتها خوفا
وهي اللي تمشي كل حد بضروفة كي زوجها والبنت كيف ولدها

هي اللي لو ريتها اتقول مرحبا ع الحال لا لاقيتها
تواطي علي شانك طرايق بيتها يوم ميتك والناس ما تنقدها
هي اللي صبايا حتى ان كان تزعل للخلا بكاية
كان حقت العيب اتقول عنا هايا ويجن اوقات ما تلقى اللي يسندها
هي اللي لولاها مايصير ف الدنيا عمار بلاها
يلتمن ادموم الناس من سباها وما من بعيدة بالنسب تعقدها

هي الحنان وهي مصدرا في كل كاين كان
وهي اللي خلقها ربنا سبحان من ضلع آدم ف الكتاب اكدها
وهي اللي عليها حرضاً لديان رضاتها ارضات الله كي تاجدها
كي ذكر مريم بنت بن عمران الخالق الباري بالعذر مجدها
باتت اعجوبة سر ها الزمان جابت غُلام ومن الدنس باعدها
وموسى عليه اعطفت ف الميدان مرة الطاغية كيف الكريم رشدها
وحنة حليمة حن م الوجدان ع الطفل اليتيم وجوزها حودها
حتى وهو فقير الرزق من الرحمن ذكر الكرامة ف الكتاب خلدها
وباتت خديجة للوفا عنوان مع زوجها صبت بحيل جهدها
وما من امثال تجيك في الأديان تبين مواقف الأم كي نجبدها

ما فيه والي كيفها ولا فيه هيف يجيك يشبه هيفها
حتى كيف تلحض في منامك طيفها تصبح سعيد وعيشتك حامدها
مهما يزيد الشعر في توصيفها وتجمع جميع الناس وتمجدها
ما يقدروا ضني علي تشريفها شيالة عمار الكون في مزودها

لا قبل قالوا لا حنان بعدها تسمر علي شانك الليل وحدها